Gjykata e Shkallës së Parë Fier ka vendosur masën e sigurisë “arrest në burg” për 25-vjeçarin Xhesion Toromani, i akuzuar për vrasjen e 32-vjeçarit Besmir Kumria vetëm pak ditë më parë në Divjakë.
Ngjarja tronditi zonën, pasi pas ekzekutimit, autori u largua gjakftohtë në errësirën e natës. Ai u kap vetëm pas disa orësh ndjekjeje intensive nga shërbimet operacionale të Policisë Fier.
Sipas hetimeve paraprake, dyshohet se vrasja ka lidhje me një konflikt të hershëm mes dy familjeve për një kanal vaditës. Megjithatë, motivacioni i saktë i krimit mbetet ende i paqartë.
Besmir Kumria punonte në zonën e Himarës gjatë verës, bashkë me vëllain e tij, ndërsa autori prej rreth shtatë vitesh nuk kishte shkelur në fshatin e tij të origjinës, Kryekuq.
Sot, Toromani doli para trupit gjykues të kryesuar nga gjyqtarja Aurora Tushe. Mbi të rëndojnë akuzat e rënda penale për “Vrasje me paramendim” dhe “Prodhim dhe mbajtje pa leje të armëve të ftohta”.
