Në një kohë kur situata e reshjeve është qetësuar, 40 efektivë të Forcave të Armatosur janë nisur drejt Darëzezës në Fier për të vendosur thasë me rërë në të dy anët e argjinaturës së kanalit kullues të Darëzezës, për të parandaluar daljen e tij nga shtrati dhe normalizimin e rrjedhës.
Efektivët e FA do të vendosin thasë me rërë në kanalin kullues të Darëzezë, kanal i cili mbledh ujërat e 30 mijë ha tokë bujqësore të 12 fshatrave. Ky ujë largohet nga tokat bujqësore me anë të 7 pompave të hidroforit të Darëzezës dhe derdhet në det.
Sot në mbrëmje si në Darëzezë, ashtu edhe në Povelçë ujërat e shumta kanë tejmbushur këtë kanal dhe përmbytin tokat bujqësore.
Për gati tre ditë reshjet nuk kanë pushuar në të gjithë vendin dhe shume zona janë përmbytur nga dalja e lumenjve nga shtrati. Zonat më të prekura dhe të rrezikuara janë qarku i Vlorës dhe ai i Fierit.