Jo pak diskutime ka ndezur brenda politikës por edhe juristëve dhe ekspertëve të fushës, çështja e mandatit dhe largimit të Kryeprokurorit Adriatik Llalla. Në përfundim të mandatit, më 7 dhjetor 2017 nisi edhe një tjetër debat i nxehtë, pasi Llalla shkoi në zyrën e Prokurorit të Përgjithshëm edhe ditën që zyrtarisht i kishte mbaruar mandati. Duket se kampet u ndanë në dy grupe, edhe pse ne çështje të drejtësisë peshorja anon sipas gjykimeve dhe interpretimeve.
Për këtë qëndrim ka reaguar për herë të parë ish-presidenti i vendit, Bujar Nishani i cili bëri bujë në media kur tha se Adriatik Llalla, nuk duhet të shkelte në zyrë në datë 8 dhjetor. Sipas ish kreut të Këshillit të Lartë të Drejtësisë, Llalla duhet ta kishte braktisur zyrën ende pa u zgjedhur dhe pa ardhur aty, kryeprokurori i përkohshëm.
Një tjetër kundërshtim ka marr edhe qëndrimi i Adriatik Llallës në zyrë, nga “Avokatët e Shqipërisë”, ku avokati Sajmir Visha thekson: “Llalla duhet të largohet pasi mandati i ka përfunduar. Ka gjyqtar të gjykatës së Larte e rretheve apo prokurori i përgjithshëm me mandat të mbaruar dhe rrinë në detyrë. Çdo veprim i tyre është i paligjshëm me mandat të mbaruar”,- deklaroi ai.
Por nuk është i këtij mendimi Kreu i Shoqatës së Prokurorëve, Shkëlqim Hajdari i cili tha se: “Llalla duhet të rrijë në zyrë derisa të zgjidhet prokurori i përkohshëm, sepse vazhdimi i qëndrimit të tij në zyrë është shumë i rëndësishëm. Ka interceptime dhe përgjime që i autorizon vetëm kryeprokurori, ndaj ka bërë mirë që ka qëndruar”. Sipas Hajdarit, në këtë fazë,
Detyrat e Kryeprokurorit të Përkohshëm janë:
- Të mbajë trupën e prokurorëve jashtë ndikimit politik dhe krimit.
- Të zgjedhë 6 prokurorë që të shkojnë në KLP duke kaluar përmes Vettingut.
- Duhet të mos shfrytëzojë kompetencën që ka për të bërë emërime përmes komandimeve.
- Drejtuesi i përkohshëm duhet të bëjë që prokurorët të kalojnë nëpër filtra e jo përmes gjuetisë së shtrigave.
- Ai duhet të jetë një figurë me integritet dhe jo një figurë e përgojuar.
Përgatiti:AlpeNews.al
