Bisedimet për Lojërat Olimpike Dimërore mes Koresë së Veriut dhe Koresë së Jugut janë një shans i ri për një dialog serioz për paqen.
Gjatë dy viteve të fundit nuk ka pasur bisedime të drejtpërdrejta midis Koresë së Veriut dhe Koresë së Jugut. Ndërkohë udhëheqësi i Koresë së Veriut, Kim, bëri në fjalimin e tij për Vitin e Ri një ofertë për bisedime dhe ofroi të dërgojë atletë koreano-veriorë për të marrë pjesë në Lojërat Olimpike Dimërore në Pjeongçang, të cilat fillojnë brenda pak javësh. Po ashtu u riaktivizua edhe lidhja e posaçme telefonike mes Phenianit dhe Seulit zyrtar.
Në krye të delegacioneve persona të rëndësishëm
Përfaqësuesit e të dyja palëve zhvilluan edhe takimin e tyre të parë në fshatin Panmunjom të Koresë së Jugut, që gjendet në rajonin kufitar mes dy vendeve. Madje ato arritën edhe një marrëveshje për pjesëmarrjen e sportistëve.
Eksperti për Korenë Hartmut Koschyk, tha në një intervistë për radion publike gjermane DLF, se “kjo tregon se midis dy vendeve ka një shans për një dialog serioz”. Delegacionet e të dyja palëve udhëhiqen nga persona të rëndësishëm. Sidomos delegacioni koreano-verior, i cili drejtohet nga Ri Son-Gvon një person tepër i besuar i Kim Jong-Unit. Megjithatë sipas ekspertit Hartmut Koschyk nuk mund të pritet ndonjë zgjidhje e shpejtë në mosmarrëveshjet për programin bërthamor koreano-verior. Sipas ekspertit Koschyk, të dy vendeve u duhet dhënë kohë në këtë çështje.
Nuk priten zgjidhje të shpejta
Bisedimet u përqendruan fillimisht tek Lojrat Olimpike, të cilat duhet të shndërrohen “në lojëra olimpike të paqes”. Megjithatë, në planin afatgjatë, çështja e programit bërthamor nuk mund të përjashtohet edhe nga këto bisedime. Sipas ekspertit Hartmut Koschyk përmes këtyre bisedimeve Koreja e Veriut synon që duke bashkëpunuar me Korenë e Jugut të vazhdojë nga njëra anë zhvillimin ekonomik të vendit dhe nga ana tjetër të jetë në gjendje të bisedojë me SHBA-në në kushte të barabarta.
Jo fjalëve dhe deklaratave agresive
Eksperti për Korenë, Hartmut Koschyk kërkoi që Kim Jong-Un të mos quhet si “i marrë” ose “i çmendur”. Ai vërtet përfaqëson një diktaturë mizore, por një zhvillim në konfliktin korean mund të arrihet vetëm në bisedime me të.
Sipas ekspertit Koschyk vendimtar për konfliktin është qëndrimi i përbashkët i bashkësisë ndërkombëtare. Vetëm një qëndrim i tillë është ajo që i bën përshtypje Kim Jong-Unit. Fjalët dhe deklartat agresive dhe marciale si ato të Presidentit të SHBA-së, Donald Trump, nuk kanë më efekt. Bashkësia ndërkombëtare duhet të garantojë që bisedimet të zhvillohen në qetësi – dhe të kujdeset që “filizi delikat” i kontaktit të mos dëmtohet.
