Me dhjetëra shoferë ndëshkohen çdo ditë për shkak të shkeljes së rregullave të qarkullimit, e megjithatë duket se nuk ka ndërgjegjësim.
Një 41-vjeçar nga Holanda u gjobit me 40.000 lekë ditën e sotme, pasi u kap duke ‘fluturuar’ me ‘Benzi’-in e tij, me shpejtësi 202 km/h në autostradën Levan-Vlorë, në vendin e quajtur “Rrethrrotullimi i Nartës”.
Po ashtu, në rrugën interurbane Tiranë- Durrës, në orët e vona të mbrëmjes së djeshme nga Policia Rrugore e Tiranës është konstatuar me radar automjeti tip Benz që drejtohej nga shtetasi F.G, banues në Tiranë që qarkullonte me shpejtësi me 156 km/h. Policia Rrugore e ka ndëshkuar me masë administrative 15.000 lekë të rinj, pezullim të lejes së drejtimit 2 muaj dhe zbritje 3 pikë nga Leja e Drejtimit.
Në 24 orët e fundit u arrestuan në flagrancë 12 drejtues mjetesh dhe motomjetesh, nga të cilët 5 për drejtim mjeti pa leje drejtimi dhe 7 për drejtim mjeti në gjendje të dehur.
Janë ndëshkuar me gjobë 1579 drejtues mjetesh, ndërsa Policia Rrugore apelon për të gjithë shoferët që të respektojnë rregullat e qarkullimit.
