Ish-deputeti i PD dhe sipërmarrësi Agron Shehaj ka thënë mbrëmjen e sotme se në Shqipëri ka pak raste të personave që kanë humbur jetën nga koronavirusi për shkak të masave të marra herët nga qeveria.
Duke folur në emisionin e Eni Vasilit, Shehaj tha se në Shqipëri masat ndaj covid-19 u morën herët dhe kjo e favorizoi vendin në betejën me infeksionin.
“Nëse në Shqipëri ka një numër të vogël të vdekurish dhe kjo është sepse masat janë marrë herët. Kjo është e pamohueshme”, tha Agron Shehaj, ish-deputet i PD mbrëmjen e sotme.
Në fakt, ky opinion i Shehaj shkon dukshëm në krah të kundër me atë të PD dhe zyrtarëve të tjerë të kësaj partie pasi ata kanë deklaruar se të vdekurit ose janë fshehur ose nuk janë raportuar. Madje sipas tyre dhe masat janë marrë vonë. Edhe për rastet pozitive nga Selia Blu janë shprehur se ka pak raste të konfirmuara sepse bëhen pak teste.
Kujtojmë se, në bazë të dhënave të përditësuara sot nga Ministria e Shëndetësisë në vendin tonë janë konfirmuar zyrtarisht 584 raste pozitive me koronavirus prej të cilëve 26 kanë humbur jetën dhe 327 të tjerë janë shëruar.
