“Unë nuk e kam vrarë djalin tim, e kam braktisur, por nuk kam dashur që ai të vdesë”. Nga Burgu Capanne i Perugias, ku Giorgia Guglielmi është mbyllur që nga e marta pasdite, 27-vjeçarja e arrestuar me akuzën e vrasjes me paramendim të djalit të saj të vogël, disa orë pas lindjes, në parkingun e supermarketit Eurospin, ka vazhduar t’i qëndrojë versionit të saj.
Mediat italiane po vijojne te japin detaje mbi ngjarjen e rende qe ka tronditur Italine, ku një 27-vjeçare, pasi lindi fëmijën në shtëpi, e mblodhi atë me një qese dhe e hodhi në një parking makinash.
Për hetuesit italianë, Giorgia e ka vrare me paramendim foshnjen e të porsalindur, të cilin e kishte me partnerin shqiptar.
Sipas autoriteteve, Guglielmi mund të mbështetej tek familja e saj, partneri shqiptar me të cilin ka edhe një vajzë 2 vjeçe, nga prindërit dhe vjehrrit, të cilët ishin në gjendje që ta ndihmonin edhe ekonomikisht. Këto të dhëna hedhin poshtë pretendimet e 27-vjeçares, e cila gjatë marrjes në pyetje pretendoi se jetonte në kushte të vështira ekonomike, që nuk i mundësonin që të mbante fëmijën, shkruajne mediat italiane.
“I pavërtetë pretendimi nga ana e saj që deklaroi se e kishte lënë aty, në mënyrë që ta gjente dikush tjetër“, thotë akuza.
27-vjeçarja për hetuesit është e ftohtë deri në pikën sa ia kishte fshehur shtatzëninë partnerit të saj, një shqiptar me profesion murator, i cili ishte edhe babai i fëmijës, ashtu sikurse edhe prindërve të saj.
Gruaja u kap nga kamerat e sigurisë në Borgo Rivo, të enjten e shkuar. Pasi kishte lindur në shtëpi, ajo e braktisi qesen me të porsalindurin në një cep përgjatë parkingut të makinave të një supermarketi në Terni.
Ishte ora 11:00. Bebja kishte vdekur kur u gjet nga një klient rreth orës 20:00.
