Shkrimtarja e njohur shqiptare Lea Ypi shkakton debat sa herë vjen në Shqipëri. E njëjta gjë ndodhi edhe këtë here ku më shumë se sa deklaratat e saj, prezenca në mjediset publike të Tiranës prodhoi debat.
Pasi u përfol si një emër i mundshëm për kryeministre të një qeverie të mundshme teknike në të ardhmen, u komentua nga lideri i opozitës Sali Berisha, i cili gjithsesi nuk e hodhi poshtë si opsion, ajo ka reaguar në një postim në Facebook ku në fund të shkrimit thotë se “çfarë i ka lënë në derë Shqipërisë”, e çfarë ka zgjedhur të marrë me vete.
Reagimi i plotë:
Mirupafshim Shqipëri.
Llaçin e shpifjeve dhe pluhurin e konspiracioneve biografike, ideologjike, gjeopolitike, sociale, materiale e sa e sa të tjera më kanë dëgjuar veshët e parë sytë për veten këto ditë, t’i kam lënë në derë.
Në fund të fundit hiçi dixhital e mediatik mbi diçka duhet ngritur që atij grushti logosh ku tek asgjëja çlirohet vetmia, trishtimi, mllefi, dështimi, varfëria e mendimit, shfrytëzimi, paburrëria, ti mbushet mendja se mbase diçka është.
Por emocionet e takimeve të këtyre ditëve me qindra njerëz të vërtetë, lexues të gjithfarë brezave, bindjesh politike, përvojash historike, me aq shumë pyetje, vërejtje, komente, kritika, fjalë nxitëse, të rinj e të reja me guxim për tu parë në sy e për tu përballur pa u fshehur në lloj lloj pseudonimesh e maska karnavalesh, shkëmbimet tona rreth fateve të botës e të këtij katundit tonë, skutave të historisë, dritës që hedh arti në kërkim të së vërtetës, të gjitha këto i mbaj me vete.
