Policia ka vënë në pranga një 54-vjeçar dhe nën hetim një 20-vjeçar për aksidentin zinxhir të ndodhur të hënën në bypass-in “Fier-Vlorë”.
Sipas policisë, dy shoferët u përplasën me pesë automjete të tjera, ku për pasojë përfunduan në spital 6 persona, dy prej të cilëve vijojnë ende nën kujdesin e mjekëve.
“Në vijim të informacionit të dhënë mbi aksidentin e djeshëm, në bypass-in “Fier-Vlorë”, informojmë se specialistët e Sektorit të Qarkullimit Rrugor arrestuan në flagrancë shtetasin Sh. K., 54 vjeç, banues në Vlorë, si dhe referuan materialet në Prokurori, ku nisi procedimi penal për shtetasin A. B., 20 vjeç, banues në Skrapar, pasi automjetet e drejtuara prej tyre, u përplasën me 5 automjete të tjera. Nga aksidenti shkuan në spital gjashtë shtetas, dy prej të cilëve vijojnë në kujdesin e mjekëve, ndërsa katër të tjerët janë larguar në banesa.”, njofton policia.
