Banorët e Rinasit dolën në protestë në ditën e dytë për të kundërshtuar vendimin e ARRSH që rrugën drejt aeroportit “Nënë Tereza” e ka bërë me një sens lëvizje. Ata thanë se iu është bllokuar arteria kryesore e lëvizjes. Po ashtu, ata u shprehën se do të vijojnë me protestat.
“Neve na kanë bllokuar arterien kryesore. Ambulanca në Rinas, shkolla është këtu. Për 2 kilometra duhet të dalim 20 kilometra. Kështu nuk bëhet. Kemi duruar sa kemi duruar, nuk shkon më kjo punë. Nëse hapet kjo jemi në rregull edhe ikim në shtëpi që tani. Edhe punë nuk kemi nga shkojmë. Do ta vazhdojmë protestën derisa të marrë rrugë kjo punë. Kemi duruar lloj-lloj deputetësh, lloj-lloj mashtrimesh nga 12 vjet, nga 30 vjet se të gjithë një fytyrë kanë”, u shpreh një prej banorëve për Klan News.
“Deri kur të hapet rruga, çfarë të bëjmë? Veç rrena janë, veç fjalë koti”, tha një tjetër.
“Edhe për këmbësorët nuk ka rrugë këtu. Këtu ndodhin aksidente çdo ditë, shteti nuk bën gjë. Sa herë vijnë votimet kemi kërkuar si për varrezat, si për rrugë, si për çdo gjë, shteti thjesht e ka quajtur Rinas dhe hajd. Këtë kërkojmë dhe ne, vetëm hapjen e rrugës, të kalojnë banorët lirshëm. Do vazhdojmë protestën, nesër mund të nxjerr edhe fëmijët në rrugë”, u shpreh një tjetër.
Banorët bllokuan lëvizjen drejt aeroportit pasi u ulën në mes të rrugës duke e bllokuar atë.
ARRSH ka vendosur për një afat të pacaktuar që lëvizja drejt aeroportit të realizohet me një kalim, me drejtimin nga Qafë Kashari-Rrethrrotullimi i “Nënë Terezës”-Ahmetaq.
Mjetet që vijnë nga veriu drejt Rinasit do të ndjekin lëvizjen Fushë Krujë-Vorë-Qafë Kashar-Aeroport.
