Policia ka mësyrë ditën e premte në një lokal në qytetin e Fushë Arrëzit ku zhvilloheshin lojëra fati dhe ka arrestuar gjashtë persona.
Blutë bënë me dije se gjatë operacionit të koduar ”Game Over”, janë arrestuar në flagrancë shtetasit: M. V., 60 vjeç, F. R., 26 vjeç, A. A., 20 vjeç, të tre banues në Pukë, E. D. 21 vjeç, D. C., 20 vjeç dhe A. M. 36 vjeç të tre banues në Fushë Arrëz.
Ndërsa u shpall në kërkim pronari i lokalit, shetasi K. H., 23 vjeç, banues në Fushë-Arrëz, i cili kishte vënë në dispozicion ambientet e këtij subjekti, për ushtrimin e lojërave të fatit.
Policia sekuestroi gjatë operacionit një tavolinë pokeri, qindra çipsa, letra bixhozi, shumat 80.900 lekë të rinj dhe 160 euro.
Materialet i kaluan Prokurorisë pranë Gjykatës së Shkallës së Parë Pukë, për veprat penale “Organizimi i lotarive të palejuara” dhe “Vënia në dispozicion e lokaleve për lojëra të palejuara”.
