Ish-mesfushori i Manchester United, Philip Mulryne, është bërë… prift.
Ai ka thënë se u mërzit nga paratë dhe femrat, ndaj dhe vendosi t’i përkushtohet Zotit.
Në korrik, irlandezo-veriori Mulryne u shugurua në prift katolik në Dublin.
39-vjeçari, i cili dikur fitonte 600.000 euro gjatë një viti si futbollist i “Djajve të Kuq”, mori një zotim varfërie.
Kjo do të thotë që Mulryne tani jeton në kufijtë e ekzistencës.
Një jetë shumë larg nga ajo me makina të shpejta dhe femra të bukura.
“Nuk më pëlqejnë zbukurimet e të qenit futbollist, paratë, klubet e natës dhe vëmendja e femrave.
Përderisa kjo ishte mirë për një kohë, në të kaluarën time, kur arrita 20 vjeç, fillova të ndihem vërtet i pakënaqur.
E kam dashur lojën e futbollit, e kam dashur trajnimin.
Mënyra e jetesës më solli kënaqësi, por asgjë nuk zgjati.
Bleva tre ose katër vetura në vit, sepse po mërzitesha dhe gjithmonë dëshiroja më shumë.
Fillova ta pyes veten: Përse po e bëj këtë?
Dhe, në thelb, përgjigja ishte se asgjë nuk ishte kurrë e mjaftueshme.
Unë kam qenë vazhdimisht i shqetësuar, nisur nga fakti se mendova se kjo mënyrë e jetës kishte për qëllim të më bënte të lumtur”, ka thënë ai për mediat britanike.
Mulryne u tërhoq zyrtarisht nga futbolli në vitin 2009 dhe hyri në Seminarin Dioqezian të Belfastit (Shën Malakia) për të filluar udhëtimin e tij drejt shugurimit.(TemA)
