Të tjera detaje kanë dalë në dritë për sa i përket dezertimit të katër komandove të Forcave të Armatosura në Angli të cilët kishin shkuar për një testim.
Në këtë testim kanë qenë 11 forca komando të cilët janë nisur drejt Anglisë në tetor të vitit 2017. Shqiptarja.com shkruan që burime të brendshme kanë bërë me dije se “Shqipëria kishte kohë nuk merrte pjesë në këtë test por ishte këmbëngulja e Ambasadës Britanike në Tiranë që bëri të mundur pjesëmarrjen e komandove shqiptarë”.
Po ashtu mësohet se për të marrë pjesë në një stërvitje në formën e një gare njohur si testi me emrin “Patrulla Cambrian” ftesa kishte ardhur nga Ministria Britanike e Mbrojtjes.
Në këtë test kanë marrë pjesë më shumë se 1000 ushtarë britanikë dhe ushtarë nga ushtritë e 28 vendeve të botës mes tyre edhe nga Shqipëria. Testi është organizuar nga Brigada 160, dhe komanda ushtarake e Uellsit në bazën Brecon.
Të njëjtat burime thonë për shqiptarja.com se 4 ushtarakët nga Batalioni i Këmbësorisë në Zallherr Aleksandër Shkulaku, Ylber Tokli, Reni Ajazi dhe Klevis Lamkaj një ditë përpara largimit nga Uellsi kanë kërkuar leje për të dalë nga baza Brecon e vizituar qytetin e Kardifit.
Pas miratimit të lejes ata nuk janë kthyer në bazë dhe mendohet se katër shqiptarët nuk janë larguar me tren nga Uellsi por dyshohet se i ka marrë një i afërm i tyre.
Pasi nuk kanë ardhur në bazë kreu grupit të 11 ushtarakëve shqiptarë menjëherë ka njoftuar autoritetet e bazës Brecon dhe Ministrinë e Mbrojtjes. Kërkimet e policisë ushtarake në Uells kanë rezultuar të pasuksesshme.