Gazetari investigativ Artan Hoxha ka bërë një bilanc tragjik të vrasjeve të ndodhura në qytetin e Shkodrës, ku në 8 muaj janë shënuar 11 viktima, së bashku me dy vëllezërit e ekzekutuar sot në lagjen Kiras. Ai kritikon punën e policise duke theksuar se gjithe Shkodra i di vrasesit.
Kambanat ranë për ata që s’kanë vesh!
Ekzekutohen vëllezërit Brahim dhe Astrit Bilali. Viktimat numër 10 dhe 11 të një seriali vrasjesh që nisi vetëm 8 muaj më parë, më 15 korrik 2018, kur para pallatit ku banonin u ekzekutuan ish-polici Boran Bercana dhe bashkëjetuesja e tij, Silvi Ndoci që mbante në prehër foshnjën e saj.
Kambanat e alarmit ranë për ata që nuk kanë vesh, dhe kur s’ke vesh bilanci dihet…
Kjo e sotmja është thjesht kronika e një vrasje të paralajmëruar…
Policia e Shkodrës, që është kthyer në ndërmarrje funerale, pasi vetëm mbledh kufoma rrugëve të qytetit, deklaron se autorët janë të panjohur dhe kanë ikur në drejtim të paditur…
Vetëm 8 muaj, 11 viktima, asnjë vrasje e zbuluar, asnjë emër autori, asnjë vrasës në burg. Për zinxhirin komandues të policisë së Shkodrës, nëse nuk kujtohet kush tu largojë nga detyra, bëhuni burra jepni dorëheqjen se më keq se kaq nuk ka ku shkon.
Në të vërtetë gjithë Shkodra e di kush janë vrasësit dhe në çfarë drejtimi kanë ikur, madje dhe në çfarë shtëpie janë duke ndjekur lajmet mbi vrasjen në tv.
