Dhoma Kombëtare e Avokatisë është solidarizuar me kolegët e Elbasanit për vrasjen e avokatit të njohur Ravik Gurra, duke ndërprerë shërbimet për tre ditë, nga e mërkura në të premten.
Në një deklaratë për mediat, Dhoma Kombëtare e Avokatisë thotë se kjo është një nga ngjarjet më të rënda dhe u bën thirrje organeve ligjzbatuese të zbardhin një orë e më parë autorët e vrasjes.
“Dhoma solidarizohet më anëtarët. Kërkojmë edhe nga opinioni që të ndërgjegjësohet. Jemi koshient që në situata të tilla një ndikim të madh ka edhe destabilizimi politik”.
Ekzekutimi i avokatit, Ravik Gurra, për kolegët në Elbasan ishte një kambanë alarmi për sigurinë, ndaj në shenjë protestë për vrasjen mafioze në qendër të qytetit vendosën bojkot të proceseve gjyqësore për 5 ditë.
Avokati Ravik Gurra u vra mbrëmjen e 22 marsit në një lokal në qendër të Elbasanit. Ai njihej si mbrojtës ligjor i Çapajve në Elbasan, Emiljano Shullazit dhe grupit Hakmarrja për drejtësi vite më parë.
Për shkak të specifikës hetimet po ndiqen nga Prokuroria e Krimeve të Rënda, ndërsa janë shtrirë në disa pista, ku kryesorja mbetet ajo për shkak të detyrës, por pa përjashtuar as implikime personale në çështje të tjera.
