Po zhvillohet sot te Krimet e Rënda seanca ndaj shtetasit Denis Shtraza, i cili akuzohet për rrëmbimin dhe vrasjen mizore të Gazmend Çollakut. Nga të dhënat e ekspertimit të gjakut në makinën e shtetasit Ervin Dalipaj rezultoi se ai nuk përputhej me gjakun e viktimës, Çollaku, dhe as të Shtrazës.
“Gjaku i Denis Shtrazës nuk përputhet me gjakun e gjetur në vendngjarje dhe gjakun e gjetur në makinën e Ervin Dalipajt. Policia gjyqësore ka ngatërruar mostrat e gjakut kur i janë marrë viktimës në morg. Gjaku i Çollakut të marrë në morg dhe në makinën e Dalipajt nuk përputhet me kodin gjenetik të nënës së viktimës, Nurije Çollaku. I kemi ekspertuar shumë herë, por sërish të njëjtat rezultate. Gjakun nga morgu e ka marrë oficeri Alfred Hoxha, i dyshohet se është ngatërruar”, thuhej në të dhënat e ekspertizës.
Ndërkohë, në lidhje me çështjen, Gjykata ka vendosur riekspertim të kampionëve të gjakut. Krimet e Rënda kanë kërkuar të testohet gjaku i gjetur në bagazh, në kalendar, në çantën e laptopit dhe në fashetat me gjakun e nënës së Gaz Çollakut.
“Të testohet gjaku në makinë me atë të kufomës. Të testohet gjaku i gjetur në bagazh, kalendar e fasheta. Të testohet gjaku në bagazh me gjakun e nënës së Çollakut”, vendosi gjykata.
