Shkarkohet Rovena Gashi, e njohur si “krahu i djathtë” i ish Kryeprokurorit Adriatik Llalla, për shkak se nuk justifikon dot pasurinë e saj marramendëse.
Vendimi u mor sot nga Komisioni i Posaçëm i Apelimit (shkalla e dytë e procesit të “Vettingut”).
Kjo do të thotë se Rovena Gashi del përfundimisht nga sistemi i drejtësisë.
KPA artikuloi në vendimin e marrë se Gashi nuk justifikon dot pasurinë e vendosur.
Trupi gjykues i KPA, vendosi në prani të vëzhgueses ndërkombëtare, se Gashi subjekt i rivlerësimit nuk ka të drejtë të ushtrojë funksionin e saj si prokurore.
Në 25 korrik të 2018, anëtarët e Komisionit të Pavarur të Kualifikimit (KPK) Genta Tafa, Pamela Qirko e Lulzim Hamitaj vendosën shkarkimin e prokurores nga detyra.
Rovena Gashi, e pezulluar nga detyra për shkak se ishte nën hetim për fshehje pasurie, nuk ishte e pranishme në seancën e asaj kohe.
ILDKPKI konstatonte se deklarimet e saj nuk janë të sakta dhe se kishte mungesë burimesh për pasurinë që zotëron dhe për rrjedhojë kishte bërë deklarim të rremë te pasurisë.
Rovena Gashi dhe ish Prokurori i Përgjithshëm Adriatik Llalla janën zyrtarisht nën hetim nga Prokuroria për disa nga veprat më të rënda penale, përfshi “pastrimin e parave të pista”.
Ajo vetë ka mbajtur në kohën e Llallës, funksionet e Drejtoreshsës së Drejtorisë së Marrëdhënieve Juridiksionale me Jashtë dhe Drejtoreshës së Zyrës së Dekriminalizimit.
Kjo i bënte ata Nr. 1 dhe Nr. 2 të organit të akuzës së Republikës.
Bashkëshorti i Rovena Gashit, Dritan Gina në atë periudhë ka qenë Kryeprokurori i qarkut të Elbasanit, një qark me shumë peshë në fushën e drejtësisë, për shkak të aktivitetit kriminal në Shqipëri.
Ky ishte fundi i palumtur i atyre që mediat i kanë cilësuar si “çifti i lumtur” i Prokurorisë së Përgjithshme.
Shkarkimi i Gashit sot në ditën e marjes së rekomandimit nga Shqipëria për çeljen e negociatave të anëtarsimit në BE, ku reforma e thellë në drejtësi ka qenë kyçi i fitores, është një sinjal i qartë se Shqipëria po lë pas të shkuarën e saj.
Alpenews.al
