Kryebashkiaku i Tiranës, Erion Veliaj, i cili prej muajit shkurt mbahet i izoluar në burgun e Durrësit, do të rikthehet të hënën e kësaj jave ( 9 qershor) në Gjykatën e Apelit të Posaçëm, ku ka kërkuar lirimin nga qelia.
Përmes avokatëve të tij, kryebashkiaku kërkon një masë më të butë sigurie, duke ofruar dhe vënë në dispozicion garanci pasurore pa përcaktuar një shumë duke ia lënë në vlersim gjykatës.
Më herët, Veliaj përmes avokatëve ka dërguar rekurs edhe në Gjykatën e Lartë për masën e sigurisë por ende nuk është caktuar data e shqyrtimit dhe trupa gjykuese. Seanca është caktuar për t’u zhvilluar në orën 14:00 nga gjyqtari Engert Pëllumbi.E njëjtja kërkesë u shqyrtua tre javë më parë në GJKKO por gjyqtari Erion Bani nuk pranoi kërkesën për ndryshim mase. Edhe Prokuroria e Posaçme ishte kundër ndryshimit të masës për kryebashkiakun.
Veliaj është në hetim për korrupsion pasiv në 9 raste dhe pastrim parash, ndërsa ndodhet në arrest me burg që prej 10 shkurtit.
