4 efektivët nuk kanë ushtruar kontroll ndaj mjetit me drejtues shtetasin Valmir Balliu, ku ishte e fshehur një sasi e dyshuar lëndë narkotike “Heroinë”.
Detaje të reja janë zbardhur nga arrestimi i 4 efektivëve të policisë në Kapshticë, si dhe drejtuesit të mjetit ku u kapën 6 kg heroinë.
Mësohet se të arrestuarit janë: Valmir Balliu banues në Pogradec, shoferi i mjeteti ku u kap droga; N/komisar Ylli Dushku me detyrë Përgjegjës turni në PKK Kapshticë; Inspektor Franc Bylyku me detyrë N/specialist kontrollor në PKK Kapshticë dhe Inspektor Lirim Hymetllari me detyrë Trupë shërbimi në PKK Kapshticë.
Sipas njoftimit të AMP, 4 efektivët nuk kanë ushtruar kontroll ndaj mjetit me drejtues shtetasin Valmir Balliu, ku ishte e fshehur një sasi e dyshuar lëndë narkotike “Heroinë”.
Sakaq, janë sekuestruar 6 kg e 134 gr lëndë narkotike e dyshuar “Heroinë”, 5 aparate celularë, 256 fishekë (pistoletë model TT), 20 fishekë armë gjahu model 12 dhe një automjet.
Njoftimi i plotë i AMP:
AMP arreston 4 punonjës policie dhe një shtetas në Pikën e Kalimit Kufitar Kapshticë të dyshuar për shpërdorim detyre
Agjencia e Mbikëqyrjes Policore (Rajoni Elbasan – Korçë) në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Korçë, ka arrestuar në flagrancë katër punonjës policie dhe një shtetas të dyshuar për kryerjen e veprës penale “Shpërdorim i detyrës”.
N / Komisar Y. D., me detyrë Përgjegjës Turni në Pikën e Kalimit Kufitar Kapshticë.
Inspektor F. B., me detyrë Specialist / Kontrollor në Pikën e Kalimit Kufitar Kapshticë.
Inspektor L. H., me detyrë Trupë Shërbimi në Pikën e Kalimit Kufitar Kapshticë.
Inspektor D. M., me detyrë Trupë Shërbimi / Kontrollor në dalje të Pikës së Kalimit Kufitar Kapshticë, i cili dyshohet edhe për kryerjen e veprës penale “Prodhimi dhe mbajtja e armëve shpërthyese dhe municioneve”.
Shtetasin V. B., banues në Vërdovë (Pogradec).
Në vijim të hetimeve dhe informacioneve të siguruara në rrugë operative u arrit të dokumentohej me prova shpërdorimi i detyrës nga ana e punonjësve të policisë, të cilët me mosveprime dhe në shkelje të ligjit nuk kanë ushtruar kontroll ndaj mjetit me drejtues shtetasin V. B., ku ishte e fshehur një sasi e dyshuar lëndë narkotike “Heroinë”.
Në cilësinë e provës materiale janë sekuestruar 6 kg e 134 gr lëndë narkotike e dyshuar “Heroinë”, 5 aparate celularë, 256 fishekë (pistoletë model TT), 20 fishekë armë gjahu model 12 dhe një automjet. Materialet proceduriale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Korçë.
