Policia e Tiranës arrestoi tre bashkëpunëtorë në grabitjen e dhunshme të kambistit dje në rrugën e Barrikadave. Krahas autorit të arrestuar dje nga ndërhyrja e një polici rrugor, blutë e Tiranës arrestuan tre bashkëpunëtorë. Elvis Berisha 37 vjeç, Xhoni Dido 23 vjeç të dy të dënuar më parë për vjedhje, dhe Blenard Hoxha 27 vjeç u vunë sot në pranga nga policia në kuadër të një operacionit të koduar “Valuta”.
Dje, dy persona të maskuar grabitën kambisti Agron Shira, i cili mbeti i plagosur nga goditjet me leva dhe thikë. Autorët u larguan me një motor, dhe njëri prej tyre u arrestua falë ndërhyrjes së dy efektivëve të Policisë Rrugore që ishin me shërbim aty pranë. I arrestuari është me inicialet E.F 35 vjeç.
Me arrestimin e tre bashkëpunëtorëve, policia sekuestroi edhe disa sende të përdorura prej tyre gjatë vjedhjeve: Motor skuter; kokore; tub metalik; thikë dhe doreza plastike; doreza dhe veshje të përdorura nga autorët; tre aparate celular dhe automjet.
Nga hetimet e policisë, të arrestuarit janë dhe autorë të dyshuar të ngjarjes së ndodhur më 07 janar 2019, në rrugën “Mine Peza”, ku dy persona të paidentifikuar, i kanë vjedhur me dhunë çantën shtetasit B. Sh., (roje pranë një pike këmbimi valutor).
