Një tas tërshërë në ditë mund të sjellë përfitime të rëndësishme për shëndetin e zemrës. Ky ushqim i pasur me fibra është renditur ndër zgjedhjet më të rekomanduara nga ekspertët për personat që duan të mbajnë nën kontroll kolesterolin, peshën dhe nivelin e sheqerit në gjak.
Tërshëra përmban fibra të tretshme, të cilat ndihmojnë në uljen e kolesterolit LDL, i njohur si “kolesteroli i keq”. Ky lloj kolesteroli mund të krijojë depozita në arterie, duke rritur me kalimin e kohës rrezikun për sëmundje të zemrës dhe probleme me qarkullimin e gjakut.
Zëvendësimi i ushqimeve të pasura me sheqer, si drithërat e përpunuara apo produktet e ëmbla të mëngjesit, me një porcion tërshëre mund të ndikojë pozitivisht në profilin e yndyrave në gjak.
Përveç zemrës, tërshëra mund të ndihmojë edhe në menaxhimin e peshës. Fibrat që përmban ngadalësojnë tretjen dhe krijojnë ndjesinë e ngopjes për një kohë më të gjatë, duke reduktuar nevojën për të konsumuar ushqime të shpeshta gjatë ditës. Sipas ekspertëve, kjo lidhet veçanërisht me uljen e yndyrës viscerale, e cila grumbullohet rreth organeve të barkut dhe lidhet me rrezik më të lartë për tension të lartë, diabet dhe sëmundje kardiovaskulare.
Studimet kanë treguar gjithashtu se tërshëra mund të ndikojë në kontrollin e nivelit të sheqerit në gjak.
Fibrat dhe antioksidantët natyralë që gjenden në të ndihmojnë organizmin të përdorë më mirë glukozën, duke ndikuar në uljen e niveleve të sheqerit si në gjendje esëll, ashtu edhe pas vakteve.
Sa i përket ndikimit në tensionin e gjakut, rezultatet e studimeve nuk janë ende të njëjta. Disa kërkime kanë gjetur përmirësime, ndërsa të tjera nuk kanë evidentuar ndryshime të rëndësishme. Megjithatë, ndikimi pozitiv në kolesterol, peshë dhe sheqerin në gjak e bën tërshërën një ushqim të vlefshëm për një dietë të ekuilibruar.
Sipas Administratës Amerikane të Ushqimit dhe Barnave (FDA), rreth 3 gramë fibra të tretshme nga tërshëra në ditë mund të ndihmojnë në uljen e kolesterolit total me rreth 5%. Kjo sasi mund të merret afërsisht nga një filxhan tërshërë të thatë ose disa porcione tërshëre të gatuar.
