Me paketën e re fiskale u miratua edhe ulja e dividendit nga 15 për qind në 8 për qind. Administrata Tatimore sjell shembujt se kur biznesi do të përfitojë tatimin 8 për qind, si dhe rastet kur sipërmarrja përjashtohet nga ulja e taksës.
“Do të aplikohet shkalla tatimore 8 për qind për fitimet e pashpërndara të realizuara në vitet 2018 e më parë, përfshirë rezervat dhe fitimet e kapitalizuara, me kushtin që: tatimi që i përket fitimeve të pashpërndara të viteve 2017 e më parë, të paguhet brenda datës 30 shtator 2019; tatimi për dividendin për fitimin e vitit 2018 të paguhet brenda datës 20 gusht 2019.
Në rast se nuk zbatohen kushtet e mësipërme, tatimpaguesi do të paguajë 15 për qind tatim mbi dividendin”, sqarojnë Tatimet. Paketa e re fiskale solli ndryshime edhe në TVSH. “Ka ndryshime në shkallët tatimore në masën 6 për qind për furnizimet e shërbimit të reklamave nga media audiovizive; 6 për qind për furnizimin e mjeteve të transportit publik të udhëtarëve me kapacitet 9+1 vende ose me shumë, me motor elektrik, deri në 31 dhjetor 2021.
Nga data 1 janar 2022 shkalla tatimore bëhet 10 për qind; 6 për qind për furnizimin e librave të çdo lloji. Do të aplikohet shkallë tatimore 0 për qind, për furnizimin e shërbimeve të përpunimit të mallrave joshqiptare të destinuara për t’u rieksportuar, nga personat e tatueshëm të autorizuar dhe nënkontraktorët e tyre, mbi bazën e dispozitave që parashikon Kodi Doganor, për operacionet nën regjimin e përpunimit aktiv.
Do të aplikohet norma prej 6 për qind, për kompensimin e fermerëve”, thuhet në udhëzimin e Tatimeve. Ndryshimet e taksave sjellin lehtësi edhe për prodhimin vendas, ku me paketën fiskale të këtij viti nga 1 janari taksa e materialeve/ artikujve plastikë dhe e ambalazheve plastike të importuara, me përjashtim të lëndëve të para në forma primare, është 35 lekë/kg nga 70 lekë/kg që ishte.
Taksa e ambalazheve prej qelqi për ambalazhet e importuara dhe të prodhuara në vend është 5 lekë/kg dhe 25 lekë/kg është taksa e lëndëve të para në të importuar dhe që përdoret për prodhimin në vend të produkteve të plastikës.
