Policia ka dhënë detaje në lidhje me ngjarjen e ndodhur mëngjesin e sotëm në rrugën “Tre Dëshmorët”, Yzberisht, ku një polic i burgjeve u dhunua dhe si pasojë e lëndimeve përfundoi te Trauma.
Blutë njoftojnë se kanë qenë tre persona që kanë dhunuar efektivin, por se ende nuk është kryer identifikimi i tyre.Në lidhje me gjendjen shëndetësore të policit, mësohet se 36-vjeçari ndodhet jashtë rrezikut për jetën.
Tiranë/Informacion paraprak
Më datë 28.09.2024, rreth orës 05:00, në rrugën “Tre Dëshmorët”, Yzberisht, shtetasi A. L., 36 vjeç, banues në Yzberisht, (punonjës pranë burgut 313) sapo ka dalë nga banesa është goditur dyshohet me sende të forta nga tre persona ende të paidentifikuar, të cilët i kanë marrë armën e shërbimit dhe më pas janë larguar.
Aktualisht 36-vjeçari ndodhet në spital në kujdesin e mjekëve, jashtë rrezikut për jetën.
Grupi hetimor po punon për kapjen e autorëve të dyshuar dhe sqarimin e rrethanave të ngjarjes.
