Gjithë Europa flet për gazetarin kritik Roman Protasevich që ka shkaktuar dhe një konflikt tashmë mes Bjellorusisë dhe botës perëndimore, por askush momentalisht nuk di gjë për të.
I vetmi aludim që vjen nga Bjellorusia është ai i kryeredaktorit të medias Nexta, Tadeusz Giczan ku Protasevich ka punuar më parë.
Sipas kryetredaktorit, bazuar tek fjalët e nënës së Protasevichit, 26-vjeçari ndodhet në spital në gjendje kritike prej sëmundjes në zemër.
Protasevich u kap në avionin e Ryanair i cili ishte nisur nga Athina për në Vilnius , por autoritetet bjelloruse e kthyen me detyrim në Minsk. Sipas dëshmitarëve, kur ka kuptuar se çfarë po ndodhte gazetari ka qenë i tmerruar dhe shumë i dëshpëruar si dhe u tha se në Bjellorusi e priste dënimi me vdekje.
