Një 45-vjeçar nga Vlora është arrestuar në Belgjikë, pasi akuzohet për plagosjen me disa plumba të ish- shefit të krimeve në qytetin bregdetar, ngjarje e ndodhur në vitin 1998. Qyteti bregdetar ishte ende i pastabilizuar nga ana e sigurisë publike, pas trazirave antifajde që kishin ndodhur në pranverën e vitit 1997, zhvillimeve kriminale për shkak të luftës së egër mes bandave, që ndodhën në atë periudhë.
I arrestuari është Dritan Xhelita. Gjykata e Apelit Tiranë e kishte dënuar atë në vitin 2016 me 14 vite burgim, për veprën penale të “Vrasja në rrethana cilësuese, e mbetur në tentativë” ndaj ish shefit të Policisë.
“Shkëmbimi i informacioneve mes Interpol Tirana dhe Policisë belge bëri të mundur identifikimin, lokalizimin dhe kapjen e shtetasit Dritan Xhelita, 45 vjeç, banues në Vlorë. Në kuadër të bashkëpunimit, Policia belge, në koordinim Policinë Kufitare të Rinasit ka bërë deportimin e këtij shtetasi nga Belgjika në Shqipëri. Gjykata e Apelit Tiranë, në vitin 2016, e ka dënuar këtë shtetas me 14 vite burgim, për veprën penale të “Vrasja në rrethana cilësuese, e mbetur në tentative” ndaj punonjësit të Policisë P. Y”, thuhet në njoftimin e policisë.
Policia Kufitare e Rinasit ia ka dorëzuar 45-vjeçarin Drejtorisë Vendore të Policisë Vlorë, ku dhe është bërë ekzekutimi i vendimit të gjykatës për këtë shtetas, e cila do ta transferojë atë në një nga burgjet e vendit, për të kryer dënimin.
