Një shqiptar, i cili tentoi të përdhunonte një vajzë angleze në lindje të Londrës është dënuar dhe në përfundim të burgut do të dëbohet në Shqipëri.
Sipas mediave angleze, që u referohet Top Channel , Lulzim Gaxha, 27 vjeç u dënua nga gjykata “Snaresbrook Crown Court” me 5 vite e 7 muaj burg, pasi pranoi akuzën për tentativë përdhunimi.
Të mërkurën e datës 30 prill 2020, rreth orës 23:40 pranë, qendrës së Barking-ut, në lindje të Londrës, një 27-vjeçare ishte duke ecur anash dyqaneve, kur pa një djalë që po e ndiqte nga pas. Ajo kaloi në anën tjetër të rrugës dhe foli me një roje sigurie të stacionit të trenit, të cilit i tha se personi që po e ndiqte i kishte ofruar para të shkonte me të.
Roja i sigurisë nisi të ecë me vajzën në rrugën kryesore për të parë nëse djali vijonte ta ndiqte e për t’u siguruar se gjithçka ishte në rregull.
Në ato momente nuk kishte asnjë shenjë të djalit në fjalë. Duke besuar se ai nuk po e ndiqte më nga pas, viktima nisi të ecë në drejtim të shtëpisë. Vetëm pas pak çastesh, djali rishfaqet përsëri dhe ajo menjëherë i telefonon policisë duke i treguar vendin ku ndodhej.
Gaxha tentoi ta tërheqë vajzën e ta përdhunojë. Oficerët e policisë mbërritën në vendngjarje dhe Gaxha u mundua të largohej duke kapërcyer një gardh aty pranë. Pas largimit, Gaxha do të ndalohej falë regjistrimit të portretit të tij nga kamerat e sigurisë, në një rrugë tjetër.
