Ministri i Jashtëm i Serbisë, Ivica Daçiç ka reaguar pas deklaratës së ministres shqiptare Olta Xhaçka për tensionet në veri të Kosovës.
Daçiç thotë se Olta Xhaçka në emër të qeverisë shqiptare nuk i ka kujtuar Kurtit se ka detyrim ndërkombëtar ‘për të mos dërguar njësite të armatosura shqiptare në Veri dhe jo të arrestojnë serbët vetëm se janë serbë’.
“Ajo (Olta Xhaçka) në asnjë fjalë nuk i ka kujtuar Kurtit se ka obligim ndërkombëtar të zbatojë Marrëveshjen e Brukselit, Rezolutën 1244 dhe të gjitha dokumentet tjera relevante, obligimin për formimin e Unionit të Komunave Serbe, për të mos dërguar njësitet të armatosur shqiptare në veri dhe jo të arrestojnë serbët vetëm se janë serbë”, shprehet në reagimin e tij kreu i diplomacisë serbe Ivica Daçiç.
***
Të martën e 27 dhjetorit, Shqipëria e dënoi situatën e përshkallëzuar në veri të Kosovës. Në një postim në Facebook, Ministrja e Jashtme, Olta Xhaçka tha se kjo është një krizë e zgjatur artificialisht dhe që të kujtojnë ditët e errëta të viteve 1990.
olta xhacka
Sipas Xhaçkës, nuk është koha që të bëhen kërcënime ushtarake apo sulme ndaj policisë së Kosovës. Ministrja shkruan se këto duhet të marrin fund dhe autorët të nxirren përpara drejtësisë.
Postimi i Olta Xhaçkës:
Po ndjekim me keqardhje minutë pas minute shfaqjen e një krize të tejzgjatur në mënyrë artificiale në veri të Kosovës dhe jemi thellësisht të shqetësuar nga përshkallezimi i tensioneve.
Barrikadat që janë ngritur në veri, jo prej ndonjë vale zemërimi popullor, por nga një grup kriminelësh famëkeq, nuk po pengojnë thjesht vijimin normal të jetës. Ato janë po ashtu skena që të kujtojnë ditët e errëta të viteve 1990 të cilat rajoni ynë i ka lënë pas njëherë e mirë bashkë me ish Jugosllavinë që shkoi e vate.
Për pak vjen viti 2023! Kjo nuk është koha për të bërë kërcënime ushtarake apo për sulme të papranueshme kundër Policisë së Kosovës, KFOR dhe Policisë së EULEX. Kjo është koha për dialog dhe bashkëpunim. Kjo përballje e rrezikshme duhet të marrë fund dhe autorët duhet të nxirren përpara drejtësisë.
Ne jemi me Kosovën në këtë situatë të vështirë dhe i bëjmë thirrje autoriteteve serbe të mos i justifikojnë as barrikatat e as grupet kriminale që refuzojnë t’i largojnë ato. Të luash me zjarrin është një ide shumë e keqe për të ardhmen e të gjithë fëmijëve tanë.
