Sali Berisha ishte sërish në qendër të fjalimit të Enkelejd Alibeajt. Teksa prezantoi kandidatin e PD, për bashkinë e Finiqit, kryetari i komanduar e cilësoi të domosdoshme situatën në të cilën ndodhen demokratët, të ndarë prej muajsh në dy grupime.
“Ju jeni në dijeni për gjithçka se çfarë ka ndodhur, po kalon një proces të dhimbshëm, e pranoj këtë, të vështirë, e pranoj këtë, por një proces të domosdoshëm. Ishte një rrezik i madh për Partinë Demokratike nëse nuk ndodhte që të merrte një masë distancimi, e gjithë Partia Demokratike do të ishte e izoluar.”
Si ish-bashkëpunëtor i afërt i Sali Berishës, shprehu keqardhje në aspektin personal, por në atë politik u tregua i ftohtë.
“Zgjidhja jonë ishte kjo: midis, edhe një keqardhjeje njerëzore, unë e pranoj, që duhej marrë ai vendim ndaj ish-kryetarit historik dhe nga ana tjetër të ruanim Partinë Demokratike të pastër, të respektonte lirinë e individit, të drejtën e pronës, të përndjekurit, pronarët. Ne zgjodhëm këtë të dytën. Me kosto, e di, me kosto.”
Me kartën e anti-korrupsionit, që e përdor si armën më të fortë në këtë fushatë, Alibeaj sulmet i drejtoi dhe ndaj Ramës e Metës.
“Nga se vuan sot shteti shqiptar? Vuan nga korrupsioni. Vuan nga abuzimi me pushtetin. Dhe jo vetëm kaq, por se drejtuesit e vjetër, treshja drejtuese e shtetit shqiptar në 33 vite, se tre veta kanë qenë Edi Rama, Sali Berisha, Ilir Meta, datojnë që nga viti 1990.”
Votën e qytetarëve të Finiqit e kërkoi duke garantuar se do të respektojë liritë e individit, referuar të drejtave të minoritetit grek në Shqipëri dhe bashkëjetesës me komunitetin vendas.
