Mes ovacioneve të mbështetësve që e prisnin jashtë Kryesisë së Kuvendit, deputeti Saimir Tahiri përsëriti frazën e famshme: Nuk keni parë gjë akoma!
Përmes një prononcimi për mediat, ai zbuloi se nuk ishte në mbledhjen me dyer të mbyllura të Këshillit të Mandateve ku organi i akuzës paraqiti provat e reja që përbënin sekret hetimor, pasi siç tha ai nuk e lejonte procedura.
Burime jo zyrtare nga mazhoranca thanë se Prokuroria nuk ka paraqitur prova shtesë gjatë seancës me dyer të mbyllura që u mbaj pasditen e sotme.
Duke shprehur besimin se e vërteta do të dalë së shpejti lidhur me këtë histori, Tahiri tha se do ti shkojë deri në fund çështjes.
Këshilli i Rregullores, Mandatave dhe Imunitetit do të mblidhet sërish nesër në orën 10:00 për marrë një vendim lidhur me kërkesën e prokurorisë për të autorizuar heqjen e imunitetit dhe arrestimin e deputetit Saimir Tahiri.” Jeni të gjithë të qartë se ishit bashkë me mua dhe dëgjuar me veshët tuaj historirat, unë e quaj estradë megjithatë le të presim dhe jam shumë i gatshëm të presim deri momentin e fundit, kurdo qoftë momenti i fundit pa lënë asnjë hallkë dhe asnjë shteg për të bërë drejtësi deri në fund”, u shpreh Tahiri.
Pyetje: Keni besim se nga provat e prokurorisë do të ngrihet një akuzë kundër jush?
“Unë jua thashë që nuk keni parë gjë akoma dhe ju duk si mënyrë e mirë për të bërë çdo lloj historie. Po jua them prapë nuk keni parë gjë akoma. Bëni durim siç po bëj unë durim, barrën e kam shumë më të madhe se ju por bëni durim. E vërteta do të dalë në dritë dhe nuk do të vonojë shumë. Ju thjesht bëni durim, unë nuk do të lë rast pa i shkuar pas kësaj historie dhe për të zbardhur të gjithë të vërtetën. Do jem i kënaqur kur e vërteta të dalë”.