“I dashur President Donald Trump, ne ukrainasit e respektojmë qëndrimin tuaj, por ju lutemi , përpara se të merrni ndonjë vendim për negociatat me Rusinë, ejani dhe shikoni me sytë tuaj njerëzit tanë , civilët, heronjtë, spitalet, kishat, fëmijët e plagosur apo të vdekur.”
Volodymyr Zelensky i bëri një thirrje të drejtpërdrejtë presidentit amerikan. Lideri ukrainas i tha këto fjalë në një intervistë para kamerave të CBS më shumë se 24 orë përpara se dy raketa ruse të kryenin masakrën e civilëve në qendër të qytetit verior të Sumy, të dielën në mëngjes.
Por tani që intervista u transmetua, fjalët e tij bëhen më aktuale se kurrë. Trump, duke iu referuar Sumy-t, foli për një “gabim të mundshëm rus”, thuajse për të falur, ose të paktën për të shpjeguar masakrën, gjë që e ndihmon atë të mos e drejtojë gishtin akuzues drejtpërdrejt nga Vladimir Putin.
