Një sistem monitorimi, sipas të dhënave nga autoritetet shëndetësore të Shteteve të Bashkuara, ka arritur në përfundimin se versioni i përditësuar i vaksinës anti-COVID i kompanisë Pfizer dhe partnerit gjerman BioNTech, mund të lidhet me goditjet në tru tek të rriturit.
Qendra për Kontrollin dhe Parandalimin e Sëmundjeve (CDC) dhe Administrata e Ushqimit dhe Barnave (FDA) nxorën rezultatin se njerëzit mbi 65 vjeç kishin gjasa më të mëdha të pësonin një goditje ishemike 21 ditë pas marrjes së vaksinës bivalente Pfizer/BioNTech.
Ishemia cerebrale shkaktohet nga bllokimet në arteriet që çojnë gjakun në tru.
FDA dhe CDC thanë se studime të tjera të mëdha, si Sistemi Monitorues i vetë CDC, të dhënat e vendeve të tjera dhe databazat e Pfizer-BioNTech, nuk e kishin shënuar këtë çështje sigurie, duke shtuar faktin se kërkohet më shumë hetim mbi rastin.
“Edhe pse tërësia e të dhënave aktualisht sugjeron se ka shumë pak gjasa që sinjali në VSD (Vaccine Safety Datalink) të përfaqësojë një rrezik të vërtetë klinik, ne besojmë se është e rëndësishme të ndajmë këtë informacion me publikun”, thanë autoritetet shëndetësore.
Pfizer dhe BioNTech thanë në një deklaratë se ata janë vënë në dijeni të raporteve për goditjet ishemike tek njerëzit e moshën 65 vjeç e lart pas vaksinimit me vaksinën e tyre të azhornuar.
