Gjendet ”porta” e hyrjes së koronavirusit të ri përmes syve: është një grup qelizash të kornesë dhe konjunktivës që kanë një përqendrim të lartë të Ace2, receptori që përdoret nga virusi për të hyrë në qelizat njerëzore.
Kjo rrugëhyrje, e identifikuar pas rishikimit të 33 llojeve të qelizave të syrit të njeriut, mund të bëhet shënjestra e barnave të ardhshme.
Zbulimi u krye nga grupi i Universitetit të Singaporit të udhëhequr nga Yuin-Han Loh, dhe u botua në ”medRxiv”, në pritje të shqyrtimit të komunitetit shkencor.
Gjatë kësaj periudhe, disa hulumtime janë përqendruar në ekzaminimin e gjeneve dhe proteinave të receptorit Ace2 të pranishëm në inde dhe organe të ndryshme.
Zbulimi i receptorit Ace2 në disa qeliza të syrit tregon atë që është dyshuar prej kohësh, domethënë që virusi është në gjendje të hyjë në trupin e njeriut përmes kontaktit të drejtpërdrejtë ose të tërthortë me mukozën e syrit, dhe është në gjendje të infektojë qelizat konjuktive.