Kolegji i Posaçëm i Apelimit vendosi sot me shumicë votash pushimin e shqyrtimit të çështjes së prokurorit të Tiranës Enklid Gjini, duke lënë në fuqi vendimin e konfirmimit të Komisionit të Pavarur të Kualifikimit.
Ky vendim i KPA-së erdhi pasi në konkluzionet përfundimtare të datës 12 janar 2006, drejtuesi i SPAK deklaroi se pas provave të reja të paraqitura prej Gjinit, shkaqet e ankimit ishin shëruar dhe kërkoi lënien në fuqi të vendimit të KPK-së.
KPA arsyeton në vendim se tërheqja nga ankimi bën që çështja nën shqyrtim të mos ketë më objekt.
“Trupi gjykues i Kolegjit të Posaçëm të Apelimit, i përbërë nga Natasha Mulaj kryesuese, Mimoza Tasi relatore, Albana Shtylla, Rezarta Schuetz, Sokol Çomo anëtarë, bazuar në nenin 4, pika 6 të ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, dhe në nenet 451, shkronja “b” e 463 të Kodit të Procedurës Civile, me shumicë votash, vendosi pushimin e shqyrtimit të çështjes që i përket subjektit të rivlerësimit Enklid Gjini”, thuhet në njoftimin e KPA-së.
Enklid Gjini e nisi karrierën në sistemin e drejtësisë në vitin 2004 dhe punon prej gati dy dekadash si prokuror në Prokurorinë e Rrethit Gjyqësor Tiranë.
