Kryetari i Lëvizjes për Zhvillimi Kombëtar, ish-deputeti Dashamir Shehi, ndërsa po komentonte situatën politike në vend, ka numëruar tre gabimet e opozitës.
Mbrëmjen e djeshme, i ftuar në emisionin “Të paekspozuarit”, Shehu është shprehur se edhe opozita ka gabimet e saj, një prej të cilave është Reforma Administrative.
“Edhe ne si opozitë kemi gabimet tona. Në fillim reforma e pushtetit lokal. Opozita nuk ka marrë pjesë dhe ky ka qënë një gabim.
E lamë reformën territoriale dhe ky ka bërë një skemë që nuk ka asnjë vlerë, ka vetëm efekte zgjedhore, as ka kursyer para dhe as ka rritur shërbimet për qytetarët”-tha Shehi.
Më tej, ai përmendi edhe raportin e opozitës me ndërkombëtarët, për të cilin tha se edhe ky ka qënë një defekt i tyre.
“Ndoshta për Reformën në Drejtësi nuk kemi qënë në gjendje ti projektojmë ndërkombëtarëve që ne jemi dakort me Reformën, por jo mënyrën sesi po bëhet kjo reformë, edhe ky është një defekt i joni.
Opozita nuk ka qënë shumë e zonja për të krijuar një raport më të besueshëm me të huajt. Përtej sherreve ky është një defekt i madh i opozitës”, u shpreh Shehi.
Po ashtu Shehi, nuk la pa përmendur edhe Kodin Zgjedhor, ndërsa theksoi se “Ka ardhur koha që të mos kemi thjeshtë një rrotacion.
Nuk duhet të hyjë dikush, e të dalë një tjetër Ramë. Nëse nuk ndryshon sistemi nuk ka më të ardhme politike.
Ky është rreziku më i madh, një njeri që ka marrë të gjitha pushtetet.”-tha ndër të tjera Dashamir Shehi.
