Prej pak muajsh situata e Covid-19 në vendin tonë është përmirësuar, por javët e fundit ka pasur një rritje të lehtë rasteve. Vaksinimi po ecën normalisht me ritme të shpejta, ku radha e të vaksinuarve ka shkuar tek personat mbi 18-vjeç.
Shtrimet në spitale janë rritur ditët e fundit dhe personat e shtruar janë ata të pavaksinuarit. Deri më tani shifrat e vaksinimit në vendin tonë janë pozitive dhe mbi 1,123,253 qytetarë kanë marrë vaksinën anti-covid.
Por cilat janë shkaqe që ka rritje të rasteve?
Në një intervistë epidemiologu Ilir Alimehmeti tregon dy arsyet që mund të kenë sjell këtë rritje të qytetarëve të infektuar.
“Rritja e rasteve supozohet që janë dy elemente, një varianti Delta që është qartësisht më i transmetueshëm rreth 40% dhe e dyta mendohet që të ketë pasur efekt dhe grumbullimet për shkak të Kampionatit Europian. Kjo rritje nuk po shoqërohet fatmirësisht me vdekshmëri, kjo është pika më e rëndësishme. Tashmë një përqindje e lartë njerëzish e ka kaluar sëmundjen në mënyrë natyrore, një tjetër përqindje e rëndësishme është vaksinuar, e si rrjedhojë ne do shohim infektime por fatmirësisht do të shohim më pak raste të rënda”-tha Ilir Alimehmeti.
Si paraqitet situata aktuale e COVID-19?
Aktualisht në sputalin COVID 1 janë të shtruar 6 pacientë një shifër jo shumë e lartë, por të gjithë personat e shtruar janë të pa vaksinuar, numri i rasteve aktive ka shkuar në 254. Mos vaksinimi përbën rrezik dhe për përhapjen e variantit “Delta” i cili dyshohet se është edhe në vendin tonë i pranishëm.
Sipas qarqeve Tirana mban vendin e parë për numrin e lartë të infektimeve dhe më pas vjen Vlora, ndërsa Gjirokastra renditet si qarku që ka një numër të vogël rastesh pozitive.
Edhe zëvëndës ministrja e Shëndetësisë Mira Rakacolli ka hedhur dyshimet se varianti Delta është i pranishëm në vendin tonë, por arma e vetme kundër këtij varianti është vaksinimi është shprehur ajo. Gjithashtu ajo është shprehur se ekziston frika e përhapjes së mutacioneve të tjera të COVID-19 pasi nuk ështv arritur akoma imuniteti natyror dhe ai i vaksinave. (KLIKO)
Që prej fillimit të pandemisë Shqipëria ka regjistruar 132,828 raste, 130,118 të shëruar dhe 2,546 hmbje jete./ Alpenews.al
