Sekretari socialist pë r Marrëdhëniet me Median Alfren Peza ka ironizuar me deklaratën e Presidentit Ilir Meta, sipas të cilës do të ketë ndëshkim për këdo që shkel ligjin për 30 qershorin.
Peza thotë se kreu i shtetit, pas vendimit të Kolegjit Zgjedhor që rrëzoi dekretin për anulimin e zgjedhjeve, ka gjetur kohën për të bërë “humor të zi”.
Postimi i Pezës:
“SHUMË SERIOZE”/ Ilir Meta: Ndëshkim kush shkel ligjin për 30 Qershorin!
Pasi KQZ e cilësoi Dekretin e tij për anullimin e zgjedhjeve, si Akt Absolutisht të Pavlefshëm dhe Kolegji Zgjedhor e konfirmoi, Ilir Meta gjen kohë për të bërë edhe “humor të zi”.
Pas takimit me ministrin e Punëve të Jashtme dhe Tregtisë të Hungarisë, Péter Szijjártó, Presidenca njofton se Meta ka deklaruar:
“Çdo veprim drejt rrugës së paligjshmërisë dhe të konfliktit, e nxjerr Shqipërinë nga perspektiva e saj europiane e njëkohësisht të gjithë aktorët e brendshëm ose të jashtëm që i kontribuojnë këtij skenari, do të mbajnë përgjegjësi përpara popullit shqiptar”.
E meqë sipas Kushtetutës, populli shqiptar e ushtron sovranitetin nëpërmjet deputetëve, sot me 13 vota pro e një kundër, Komisioni i Ligjeve miratoi propozimin për ngritjen e një komisioni hetimor parlamentar, për shkarkimin e Presidentit të Republikës.
Shkaku: Për “shkelje të Kushtetutës nga ana e tij me dekretin që anulon datën e zgjedhjeve vendore të 30 qershorit.”
Pas kësaj, ec e mos qeshni po deshët, “me shakatë tërë kripë” të Ilir Metës!