Gjykata e Apelit të Korçës ka marrë vendimin për të rikthyer në burg Gert Gjenerarin, i njohur ndryshe si Gerd Gjenerali që ekzekutoi “të fortin” e Tiranës Naim Zyberi.
Sipas konkluzioneve të nxjerra nga trupa gjykuese, mësohet se është prishur vendimi i shkallës së parë dhe është shpallur në kërkim i dënuari për ta rikthyer në ambientet e izolimit.
Ndëkohë, dyshohet se ndaj gjyqtarit Markelian Kuqo që i dha lirinë ka nisur procesimi penal.
Rihapja e dosjes, nisi fill pas ankesës publike të ministres së Drejtësisë Etilda Gjonaj e cila kundërshtoi lirimin e tij.
Kjo e fundit, në një dalje të menjëhershme për media, dënoi lirimin me kusht ku nënvizoi se në lidhje me çështjen, Ministria e Drejtësisë i është drejtuar KLGJ-së dhe Inspektoriatit të Lartë Shtetëror për nisjen e hetimit disiplinor ndaj gjyqtarit që dha vendimin, ndërsa njftoi se është pezulluar nga detyra drejtori i Burgut të Drenovës dhe dy punonjës të tjerë.
“Nga hetimi rezulton se vendimi pavarësisht se nuk është i formës së prerë është dhënë në kundërshtim me kriteret ligjore dhe kriteret e kodit penal. Për këtë arsye MD i është drejtuar KLD dhe inspektoriatit duke kërkuar procedim disiplinor për gjyqtarin që ka dhënë vendimin.
Për këtë arsye, Ministria e Drejtësisë i është drejtuar KLGJ dhe inspektoriatit të Lartë Shtetëror për inicimin e hetimit disiplinor për gjyqtarin. Shpreh besimin se Prokuroria, Këshilli i Lartë Gjyqësor dhe Inspetorati do të veprojnë shpejt dhe do të marrin të gjitha masat e nevojshme për hetimin administrativ dhe penal në lidhje me këtë çështje.
Pavarësisht se Vettingu është në vijim, paralelisht me të gjitha rastet dhe vendimet skandaloze do të hetohet për të vënë para drejtësisë”, u shpreh më herët Gjonaj.
I dënuari me burgim të përjetshëm Gert Gjinarari fitoi lirinë me vendim të gjyqtarit Markelian Kuqo në argumentimin se “është rehabilituar plotësisht, ka sjellje shembullore dhe ka normalizuar marrëdhëniet me trashëgimtarët e viktimës”. (TemA)
