Isa Sakja u zgjodh kryetar i Bashkisë së Kavajës në zgjedhjet e parakohshme lokale që u mbajtën në të njëjtën ditë me zgjedhjet parlamentare më 25 qershor 2017. Fitorja e Isa Sakjes riktheu Partinë Demokratike në administrimin e Kavajës pas 6 viteve të drejtimit të Elvis Rroshit, i cili e humbi mandatin për shkak të ligjit të dekriminalizimit.
Isa Sakja zotëron një master për Psikologji Klinike nga Fakulteti i Shkencave Sociale në Tiranë. Ai është angazhuar që herët me Partinë Demokratike dhe në shtator 2015 u zgjodh kryetar i PD-së për degën e Kavajës. Para se të zgjidhej kryetar i Bashkisë, Sakja ka punuar për Drejtorinë e Përgjithshme të Doganave.
Ky raport është prodhuar nga BIRN pas administrimit të deklaratave të pasurisë nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasuritë e kryetarëve aktualë të bashkive të vendit në fund të mandatit të tyre.
Skeda grafike e mëposhtme paraqet pasurinë e deklaruar nga kryetari i Bashkisë së Kavajës nga viti 2008 deri në fund të vitit 2017. [Kliko për skedën në PDF]
Skeda e pasurise se deklaruar nga kryetari i Bashkise se Kavajes, Isa Sakja per vitet 2008-2017.
Kryebashkiaku Isa Sakja zotëronte familjarisht 1.9 milionë lekë pasuri në vitin 2008; kur deklaroi për herë të parë interesat e tij private në cilësinë e punonjësit të Drejtorisë së Përgjithshme të Doganave. Në fund të vitit 2017, pasuria familjare e kryebashkiakut Sakja është 8.9 milionë lekë.
Sakja deklaron pasuri të patundshme në vlerën e 7.7 milionë lekëve, një automjet prej 650 mijë lekësh, 400 mijë lekë kursime në cash dhe likujditete bankare prej 148 mijë lekësh.
Të ardhurat familjare për periudhën deklaruese janë 11.6 milionë lekë. Rreth 53% e të ardhurave burojnë nga paga e Z.Sakja, ndërsa 38% zënë pagat e familjarëve. Të ardhurat nga pensioni i prindërve zënë gjithashtu rreth 7% të të ardhurave totale.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. BIRN kreu kontrollin aritmetik/logjik për 7 vite të deklarimit, të cilat rezultuan pa probleme.
Nga analiza cilësore e deklaratave të pasurisë vlen për t’u theksuar se Z.Sakja ka deklaruar në vitin 2008 se ka përfituar një autoveturë “Opel Corsa” me vlerë 300 mijë lekë si dhuratë nga familja.
Si pronë të patundshme, ai zotëron vetëm një apartament në Tiranë në bashkëpronësi me bashkëshorten me vlerë 50 400 euro. Apartamenti ka si burim tre kredi bankare, dy prej të cilave janë marrë në vitin 2008 dhe një e tretë e deklaruar në vitin 2009.
Deklarata Para Fillimit të Detyrës
Deklarata e pasurisë së vitit 2008
Deklarata e pasurisë së vitit 2009
Deklarata e pasurisë së vitit 2010
Deklarata e pasurisë së vitit 2011
Deklarata e pasurisë së vitit 2012
Deklarata e pasurisë së vitit 2014
Deklarata Para Fillimit të Detyrës 2017
Deklarata e pasurisë së vitit 2017
Për më shumë dokumente vizitoni databazën tonë dokumente.reporter.al
