Zjarri që ka përfshirë kabinën elektrike të një pallati shumëkatësh në zonën e Plepave në Durrës ka shkaktuar panik mes banorëve.
Tymi dhe flakët kanë përfshirë hyrjen e pallatit pak pas mesditës dhe është dashur ndërhyrja e zjarrfikësve për të vënë nën kontroll flakët.
Siç duket edhe nga pamjet filmike dhe fotot që publikon DurrësLajm, kabina elektrike është shkrumbuar tërësisht, duke lënë banorët pa energji në këtë ditë feste.
Ndërhyrja e zjarrfikësve bëri të mundur shuarjen e flakëve brenda një kohe të shkurtër, madje efektivët ndihmuan edhe disa nga banorët, që të bllokuar nga tymi dhe flakët nuk dilnin dot nga pallati.
Banorët kanë deklaruar se i ishin ankuar që dy javë më parë administratorit të pallatit, pasi ndjenin erë djegësirë, por u desh zjarri i sotëm, që të bëhej stakimi i energjisë për të zbuluar shkakun e vërtetë të rënies së zjarrit.
