Drejtori për Sigurinë Publike dhe Rendit në Policinë e Shtetit Gjovalin Loka gjatë një bisede në studio e NEWS 24, prezantoi disa nga masat e marra nga Policia e Shtetit gjatë sezonit turistik. Sipas Lokës në të gjithë zonën bregdetare, ku numri i pushuesve është më i lartë është bërë një riorganizim i policisë.
“Sezoni është një prioritet i Ministrisë së Brendshme dhe Policisë së Shtetit. Kemi një plan masash për këtë sezon. Janë masa të shtuara për garantimin e rendit dhe sigurisë publike në zonat turistike. Janë marrë forca nga brenda territorit duke i çuar në zonat bregdetare. Kemi forcat operacionale të stacionuara Fier, Shkodër dhe Tiranë. Kemi hapur stacione provizore në Theth dhe Ksamil të cilat janë të pajisur me të gjitha mjetet për vendosjen e rendit dhe sigurisë”, u shpreh Loka
Përsa i përket sigurisë dhe rendit, ai deklaroi se janë marrë masa për të parandaluar çdo ngjarje kriminale.
“Ka një plan të vendosjes së forcave dhe ka prezencë të shtuar të policisë ku ka prani të madhe të qytetarëve. Veç shërbimeve të dukshme ne kemi edhe prezencë të shtuar të agjentëve civil të policisë kriminale të cilët janë aty për të parandaluar çdo ngjarje kriminale në disko apo plazhe”
Në lidhje me zhurmat, Drejtori i Sigurisë dhe Rendit Publik tha se deri më tani nuk ka pasur probleme pasi bizneset kanë respektuar rregullat e përcaktuara.
“Task Forcat në qarqe po funksionojnë shumë mirë. Në rast se do të ketë shkelje në afatet e vendimit të Këshillit të Ministrave për oraret e muzikës do të ndërhyhet dhe do ketë sanksione” nënvizoi Loka.
