Zëvendës ministrja e Brendshme Rovena Voda sqaron ndryshimet e parashikuara në projektligjin për dhënien e shtetësisë shqiptare sipas të cilit parashikohet se tashmë do të ketë pasaporta shqiptare do të jepet përmes lindjes, origjinës, lindjes në territorin e Republikës së Shqipërisë, natyralizimit dhe birësimit.
Rovena Voda shpjegoi se pasaporta shqiptare nuk do të jepet për shkak të etnisë së përbashkët shqiptare çka do të thotë se shqiptarët e Kosovës, Maqedonisë, Malit të Zi dhe trojeve të tjera shqiptare nuk përfitojnë automatikisht prejt etnisë. Voda sqaroi se ndryshimet në ligj i japin mundësi të marrin pasaporta shqiptare ata që kanë lidhje gjaku me një person me shtetësi nga Republika e Shqipërisë.
Ajo u shpreh se shteti mbetet i angazhuar që asnjë i lindur apo banues në territorin shqiptar të mos mbetet pa shtetësi shqiptare. Zv. ministrja sqaroi se duke aplikuar Jus Solin, tashmë çdo person që lind në territorin e vendit tonë do mund të marrë shtetësinë shqiptare.
Jus Soli është termi juridik ,që vjen nga latinishtja, i cili përdoret për të treguar të drejtën e kujtdo të fitojë shtetësinë e një vendi ku ka lindur pavarësisht kombësisë. Kjo e drejtë ushtrohet në mënyrë të plotë në Shtetet e Bashkuara të Amerikës, por në asnjë vend të Bashkimit Europian.
Voda sqaroi se pasaportë shqiptare do të ketë edhe për investitorët që kanë interes kombëtar por duke rritur kontrollin në bashkëpunim me institucionet e tjera për të refuzuar ata që pastrojnë paratë ose kanë probleme me ligjin. Ndërsa për shtetësitë shqiptare të dhëna nga presidenti i Republikës që rezultojnë me probleme me ligjin, Voda tha se ajo mund të hiqet me propozim të ministrit të Brendshëm.
“Duke parë të gjitha problematikat ne menduam që të krijonim një ligj të ri, që i përket legjislacionit të brendshëm të vendit. Ka disi risi. kemi futur si një nga mënyrat e përfitimit atë përmes shtetësisë. Me origjinë lidhet edhe lidhja mes personit te lindur dhe personit që kërkon të fitojë shtetësinë. Të gjithë ata të huaj që jetojnë jashtë por arrijnë të provojnë se kanë lidhje deri në shkallë të tretë me një person me shtetësi shqiptare do mund ta përfitojnë edhe ata. Fëmijët e gjetur në territorin e Shqipërisë do përfitojnë shtetësinë shqiptare.
Këtë e kemi bërë për angazhimin që ka bërë qeveria shqiptare. Ne dimë raste të shumë sakrifice që jetojnë në Greqi dhe fëmijë të hasin pengese për t’u regjistruar në gjendjen civile. Çdo fëmijë i lindur nga prindër shqiptar do mund të marrë shtetësinë shqiptare. Ka një procedurë lehtësuese në ligj. Kemi lehtësira edhe në rastet kur shtetas shqiptarë duan të rifitojnë shtetësinë shqiptare. Garantohet shtetësia shqiptare edhe kur ke shtetësia të tjera. Një e veçantë tjetër në interes të sigurisë kombëtare, kemi futur edhe rastin kur shtetasi heq dorë vullnetarisht por edhe kur i hiqet edhe pa kërkesë. Këto raste janë kur vërtetohet kur personi është pjesë e grupeve kriminale ose terroriste. Në këtë rast kjo bëhet me kërkesë të ministrit të brendshëm”, tha Rovena Voda.
