Aqif Rakipi dhe Gledion Rehovica nuk do të jenë më deputetë. Ky është vendimi që mori sot KQZ-ja pas kërkesës së bërë nga Prokuroria e Përgjithshme.
Ata akuzoheshin se nuk kishin deklaruar të kaluarën e tyre në Itali. Pas largimit të tyre, në listë për tu bërë deputetë janë një burrë e një grua.
Vendin e Aqif Rakipit si deputet i PDIU-së do ta marrë, Dritan Bici, ish-kryebashkiak i Gramshit dhe i njohur për disa bëma të tij.
Ndërsa vendin e Gledion Rehovicës, si deputet i LSI-së do ta marrë Silva Caka, ish-deputete e legjislaturës së kaluar.
Kush janë ATA:
Silva Caka renditej e treta në listën shumë ermërore të LSI-së për qarkun e Beratit. Caka ka qenë deputete edhe legjislaturën e kaluar ndërkohë që në zgjedhjet e fundit mbeti jashtë Kuvendit.
Pra, ka qënë deputete nga viti 2013 deri në 2017. Gjithashtu është një nga nga themeleueset e Lëvizjes së Gruas për Integrim.
Silva është anëtare e Komisioni për Çështjet Ligjore, Administratën Publike dhe të Drejtat e Njeriut.
Një tjetër personazh interesant, që i ka hyrë me makinë në fushës së futbollit për të rrahur arbitrin e ndeshjes, pritet të ulet në Kuvend. Është fjala për Dritan Bicin, i cili zuri vendin e Aqif Rakipit, pasi KQZ-ja i hoqi mandatin ketij të fundit.
Dritan Bici në mars të vitit 2013 kur ishte kryebashkiak i Gramshit, hyri me makinë në stadium për të rrahur arbitrin e ndeshjes, pasi ishte i pakënaqur me vendimet për ndeshjen. Ngjarja skandaloze tërhoqi vëmendjen edhe të mediave të huaja. “Elf Voetbal”, revista më e madhe për futbollin në Holandë, ishte një nga mediat e huaja që e ka pasqyruar ngjarjen. Asokohe kryebashkiaku u dënua për të mos hyrë në stadium deri në fund të sezonit futbollistik. Për atë ngjarje ai kërkoi falje publikisht, duke shpjeguar edhe arsyet përse e shtynë të futej në stadium me makinë për të dhunuar arbitrin.
Lidhja e tij me partinë e Shpëtim Idrizit është e re, pasi që prej vitit 1992, Bici ka qenë pjesë e strukturave të PS-së dhe kryebashkiak i kësaj force politike për vite me radhë deri pas disa përplasjeve me Gjiknurin dhe u largua.
Por përtej këtyre situatave sa banale aq edhe të zakonshme në moçalin politik të Shqipërisë, Dritan Bici figuron gjithashtu edhe i dënuar me vendim gjykate. Sipas asaj që ai shkruan në formularin e vetëdeklarimit, rezulton i dënuar me vendim të formës së prerë në shtator 2013 për incidentin që ndodhi në stadium. Ish-kryebashkiaku është dënuar me 60 orë punë të detyruara për interes publik. Dënimi në këtë formë ka zgjatur rreth 5 muaj.
Përgatiti: AlpeNews.al
