Akademiku Stevo Pendarovski, presidenti i pestë i sapozgjedhur i Maqedonisë së Veriut, vjen nga një përvojë e madhe në botën akademike dhe në politikë.
Stevo Pendarovski filloi karrierën e tij në politikë si Zëvendësministër për Marrëdhënie me Publikun në Ministrinë e Punëve të Brendshme dhe si shefi i Departamentit Analitik dhe Kërkimor të kësaj ministrie në vitet 1998-2001.
Ai ishte më pas edhe anëtar në Këshillin e Sigurisë Kombëtare dhe Kryetari i Politikave të Jashtme në kabinetin e presidentit Boris Trajkovski nga viti 2001 deri në vdekjen e Trajkovskit në vitin 2004.
Pasi udhëhoqi Komisionin Shtetëror të Zgjedhjeve (KSHZ) në vitet 2004-2005, Pendarovski vazhdoi të ishte këshilltar për Politikën e Jashtme të presidentit Branko Cervenkovski nga viti 2005 deri në vitin 2009, transmeton newsbomb.al.
Më 4 mars të vitit 2014 Pendarovski u përzgjodh nga partia opozitare e asaj kohe, (sot në pushtet) Partia Social-Demokrate (LSDM), si kandidat i saj në zgjedhjet presidenciale të prillit 2014 kundër Gjorge Ivanovit, kandidatit nga partia në pushtet e asaj kohe VMRO-DPMNE-së, i cili kandidoi për mandatin e dytë si president, ku dhe i fitoi.
Ai u përzgjodh kandidat presidencial për herë të dytë nga partia Social Demokrate (LSDM) dhe aleatja e saj shqiptare BDI-ja e Ali Ahmetit në zgjedhjet presidenciale të këtij viti, ku dhe sapo i fitoi dhe shpalli fitoren e tij.
Zyrtarisht akademiku Stevo Pendarovski tashmë është presidenti i pestë i Republikës së Maqedonisë së Veriut, që prej kjo e fundit u pavarësua nga Federata Jugosllave më 1992, transmeton newsbomb.al.
Pendarovski është presidenti i pestë i Maqedonisë së Veriut pas presidentit Kiro Gligorov (1992-1998), Boris Trajkovskit (1998-2003), Branko Cervenkovskit (2004-2009) dhe Gjorge Ivanovit(2009-2019).