‘Orange Club’ është vendosur sërish në qendër të vëmendjes së opinionit publik. Një sherr masiv mes disa turistëve të huaj dhe rojeve të sigurisë së lokalit kanë tmerruar turistët.
Pas përfundimit të koncertit të këngëtarit Noizy në ‘Orange Club’ në Sarandë dhe kur ora shkonte drejt mbylljes së lokalit, një grup turistësh të huaj të dehur kanë dashur të hyjnë në lokal. Pavarësisht se u është shpjeguar se lokali po mbyllet, ata kanë dashur të hyjnë me forcë, duke përdorur edhe dhunë, dhe janë penguar nga rojet.
Prezenca e forcave të Shqiponja ka bërë që turistikët e huaj të shpërndahen dhe të largohen. Nga sa mësohet nuk ka asnjë të shoqëruar.
Pak javë më parë pronari i këtij lokali, Spiro Iljadhi është qëlluar me rreth 20 plumba e ndërsa ky i fundit i është kundërpërgjigjur me armë, teksa disa ditë më vonë iu tentua që t’i vihej flaka. Një reagim pati edhe kryeministri Edi Rama i cili, duke sjellë rastin e sulmit me armë në bar ‘Orange’, tha se ka pronarë lokalesh që tërheqin prej hunde shefa komisariatesh duke kërkuar që të shkarkohet zinxhiri komandues në Sarandë.
Kjo ngjarje në këtë lokal, solli edhe shkarkimin e shefit të komisariatit të Sarandës, Syrja Bello dhe në vend të tij u emërua Klodian Kondi.