Ndonëse Komiteti Teknik i Ekspertëve ka ndaluar grumbullimet me më shumë se 10 veta në ambient ta hapur dhe të mbyllur, Report Tv mëson se Kuvendi ka planifikuar të zhvillojë seancën plenare ditën e enjte.
Një vendim i tillë është bërë i ditur dhe në faqen zyrtare të Kuvendit ku është publikuar rendi i ditës. Seanca e së enjtes është parashikuar të nisë me një interpelancë urgjente me kryeministrin Edi Rama, thirrur nga deputeti Ralf Gjoni dhe interpelanca me ministren e Shëndetësisë, Ogerta Manastirliu.
Nuk dihet nëse Kuvendi ka marrë një leje të posaçme nga Komiteti Teknik, për këtë mësohet se kryetari Gramoz Ruçi do të jap një komunikim ditën e nesërme në Konferencën e kryetarëve. Fillimisht Kuvendi njoftoi se do të anuloheshin të gjithë seancat plenare deri në një vendim të dytë, por sot Ruçi ka dalë me një urdhër të dytë ku njofton deputetët që të enjten ka seancë.
