Zbardhen detaje të reja nga pakoja e dyshimtë, që ka alarmuar qytetin e Elbasanit, këtë paradite. Gazetari Fatmir Popja raporton për “BalkanWeb” se pakoja është vendosur në një nga rrugët kryesore të qytetit, përkatësisht në segmentin që lidh bulevardin kryesor me Drejtorinë e Policisë.
Siç raporton gazetari Popja, pakoja është pikasur rastësisht nga kalimtarët. Ata kanë dëgjuar një zhurmë dhe më pas kanë parë pakon e dyshimtë të vendosur në rrugë.
Menjëherë ka mbërritur në vendngjarje edhe policia, e cila ka evakuuar gjithë zonën. Në vendngjarje kanë mbërritur ekspertë të fushës së eksplozivëve, si dhe një shërbim zjarrfikës, të cilët po bëjnë verifikimin e llojit të eksplozivit për të bërë pas edhe shpërthimin e tij.
Nga ana e saj, policia ka vendosur një perimetër të gjatë sigurie, ndërsa në pamjet që gazetari Popja sjell në redaksinë e “BalkanWeb” shihen ekspertët duke punuar për shpërthimin e kontrolluar të lëndës plasëse.
