Erion Isufi, kunati i kreut të Partisë Demokratike Lulzim Basha ka humbur betejën ligjore me deputetin e Partisë Socialiste Ervin Bushati. Isufi, kishte paditur në gjykatën e Tiranës Bushatin duke kërkuar prej këtij të fundit një dëm pasuror prej 20 milion lekë të vjetra.
Kjo pasi sipas kunatit të Lulzim Bashës, deputeti i PS Ervin Bushati, i kishte cënuar nderin dhe moralin me deklaratat e tij të bëra në masmedia, duke e akuzuar për lidhje korruptive. Por pas disa seancave gjyqësore, gjyqtari i Tiranës Ervin Pollozhani vendosi të rrëzojë kërkesën e Isufit, duke e cilësuar kërkesën për dëmshpërblim prej 20 milionë lekësh, si të pabazuar në ligj.
Gjyqtari Pollozhani argumenton se qëndrimet publike të deputetit Bushati, janë opinione politike që i adresohen kryetarit të Partisë Demokratike Lulzim Basha, ku mes këtij të fundit dhe Erion Isufit, dihet tashmë që ka një lidhje të afërt familjare. Nisur në këto kushte, gjykata në muajin Mars 2020 ka vendosur të rrëzojë kërkesën dhe shpenzimet prej 203 mijë lekë të vjetra, t’ia ngarkojë biznesmenit Erion Isufi.
