Po zhvillohet në Kolegjin e Posaçëm të Apelimit seanca për komisionerin Heral Saraçi. ONM kërkoi procedim disiplinor për veprime që cënojnë figurën e komisionerit.
Trupa gjykuese vendosi që seanca të zhvillohet pa praninë e kamerave. Seanca e parë në datë 5 mars u shty, pasi Heral Saraçi kërkoi kohë për t’u njohur argumentet kundër tij. Trupa gjyqësore vendosi sot që të pranojë kërkesën e Heral Saraçit që të mbrohet nga avokati, Shaqir Hasani.Avokati kërkoi që të njihet me dosjen, por kërkesa u rrëzua. “Unë jam zgjedhur një ditë më parë pasi një avokat tjetër nuk mundi të vinte. Ndaj u zgjodha pak orë më parë”, tha ai.
Saraçi është shprehur para trupit gjykues se “Nëse doni që të përfundoni hajde të përfundojmë me akuzën e shkarkimit. Por unë dua kohë dhe avokati do kohë për një mbrojtje profesionale. Mbi ato akte duhet të përgatis mbrojtjen profesionale” tha ai. Ndërsa avokati shtoi se “kur akuzohet dikush i referohet akti që ka shkelur. Ndaj cilin akt ka shkelur Saraçi nga 400 akte qa ka administrata”. Por relatori Sokol Çomo theksoi se “E kemi njoftuar Saraçin për të drejtën e mbrojtjes”. Gjyqtarja Natasha Mulaj tha se”kjo situatë e krijuar nga z.Saraçi është e padëshirueshme. Çfarë kohe i duhet z.Saraçi për prova që i ka prodhuar vetë? Z. Çomo zbatoni afate që ju ka vendosur ligji, këtu nuk ka vend për të bërë show”.
Pas deklaratës së gjyqtares, Çomo reagoi duke u shprehur se “Z.Saraçi do mbani apo jo qëndrim si do vazhdojmë? Avokati ndërhyri duke u shprehur se “ka ikur koha kur të drejtat e njerëzve i mbronte partia”. Gjithashtu ka pasur edhe një debat mes avokatit dhe relatorit Çomo, pasi ky i fundit iu drejtua se “Saraçi pas 30 minutash duhet të sqarosh si do mbroheni pasi ju e dinit se afatet e avokatit ishin të limituara”. Seanca është ndërprerë për 30 minuta.
Sipas ONM Heral Saraçi ka penguar punën e komisionerit publik. “Nuk ka bashkëpunuar me komisionerin tjetër Florian Ballhysa për të bërë një rregullore për institucionin”. Një nga shkeljet e Heral Saraçit ishte edhe firmosja e dy kontratave për dy punonjës të administratës pa rënë në dakordësi me komisionerin e dytë Ballhysa. Komisioneri Publik përgatit raporte për rastet e refuzimit për moszbatimin e rekomandimeve te Operacionit Ndërkombëtar të Monitorimit për të paraqitur ankim ne Kolegjin e Apelimit. Institucioni është ngritur si pjesë e procesit të rivlerësimit të gjyqtarëve dhe prokurorëve.