Kryeministri Edi Rama teksa parashtroi disa nga argumentet e tij se pse është pro listave të mbyllura në zgjedhje, ironizoi dhe një deputet të opozitës, që sipas tij ishte rast unikal në planet.
Duke u ndalur tek koalicionet dhe tek fakti se pse ishte kundër, Rama solli shembullin e deputetit Lefter Maliqit, (pavarësisht se nuk i përmendi emrin) që ishte pjesë e listës së PD, ndërsa theksoi se ai kishte punuar për të siguruar vota të PS-së por që nuk kishte votuar për veten. Mes të tjerash Rama tha se listat e hapura nuk do të sillnin më shumë demokraci, ndërsa shtoi se diskutimi për këtë çështje për të nuk është tabu.
“Zonja Hajdari unë nuk besoj se listat e hapura sjellin demokraci, rritje të cilësisë. Që do të hapen listat dhe këtu do të vërshojë rinia dhe të tjerët do të goditen nga votat. Se tregon kjo eksperiencë. Është e pavërtetë që listat e hapura e kthyekan kryetarin e një partie në një njeri si gjithë të tjerët. Ia heqkan të drejtën për të zgjedhur dhe listat e mbyllura e kthejnë atë në një bunker. Kjo është e pavërtete. Është përgjegjësi e lidershipit përmbajtja e listave. Fakti që jeni ju në Kuvend e të gjitha gratë, janë nga listat e mbyllura jo nga të hapurat. Transformimi i Parlamentit, balancimi gjinor, është nga listat e mbyllura. Listat e hapura për mua nuk janë tabu. Por nuk duhet të na impononi dhe mos na kërcënoni. Mos u bëni si ata që ikën. Se me PS me kërcënime, e tregoni se sa të vegjël jeni. Ne jemi në gjendje që si shqiptar, si përfaqësues të partisë nga të gjitha anët, që të gjejmë një zgjidhej në shqip, jo në anglisht. Ju them atyre dhe ë gjithë kanakareve që dalin në tv, se Kuvendi është i Ramës dhe i Ballës. Se në fakt kam më shumë respekt për ju se sa për atë jashtë. Natyrisht që këtu ka disa lloj tipash. Por nuk shoh asnjë ndryshim. Kemi Valterin dhe ndonjë tjetër që na heq mallin e Lulit, se ka po atë pllakë. Vota e diasporës për ne nuk është e harruar. Është një sistem i tërë që do punë, jo fjalë gojë. Kur vjen puna tek koalicionet mos më bëni të flas. Do i kërkoj ndjesë Murrizit se do i kopjojë një shprehje. Është një deputet këtu që është produkti më domethënës e pse koalicionet nuk janë unitet demokratik në program. Është një deputet që nuk ka votuar as për veten e vet. S’ka votuar, është i pari dhe i fundit në planet. Rasti unikal. Ka ardhur këtu me PD. Ka bërë fushatë për mua dhe mes dy kohërave ka kapur dhe ai një drejtori.”, tha Rama.
