Ish-ministri i Shëndetësisë, Ilir Beqaj, është rikthyer në Burgun e Durrësit pas qëndrimit për trajtim në QSUT, ku qëndroi për një muaj për shkak të temperaturës së lartë dhe një infeksioni të rëndë në lëkurë. Burime nga Drejtoria e Burgjeve konfirmojnë se pas stabilizimit të gjendjes shëndetësore, Beqaj u transferua sërish në IEVP Durrës, ku po vuan masën e sigurisë “arrest në burg” për abuzim me fondet e BE në SASPAC.
Beqaj është marrë i pandehur në dosjen “Sterilizimi” për akuzën e “vjedhjes duke shpërdoruar detyrën” si pjesë e një grupi të strukturuar kriminal. Procesi gjyqësor po zhvillohet i veçuar nga të bashkëpandehurit, në Gjykatën e Posaçme, nën drejtimin e gjyqtares Rudina Palloj.
Në të njëjtën gjykatë, vijon edhe shqyrtimi paraprak i dosjes SASPAC, ku Beqaj mbetet gjithashtu i pandehur.
